IVTM: Impòst sus Veïculs de Traccion Mecanica
Qué ei er IVTM?
Er Impòst sus Veïculs de Traccion Mecanica ei un impòst de titolaritat municipau e d’exaccion obligatòria. Ei un impòst dirècte que graue era titolaritat des veïculs de traccion mecanica, avienti entà circular pes vies publiques.
Quini veïculs tributen?
Aqueri que cònsten inscriti enes registres dera Direccion Generau de Transit, mentre non ne causen baisha.
Excepcions:
- Non tributen aqueri veïculs qu'agen causat baisha des registres pera antiquitat deth sòn modèl, encara que poguen èster autorizadi entara circulacion excepcionalaments coma conseqüéncia d’exibicions, concorsi o corses limitades ad aguesti tipes de veïculs.
- Tanpòc tributen es remòrques o semiremòrques qu'agen ua carga utila non superiora a 750 kg.
Qui a de pagar er IVTM?
Tota persona fisica o juridica a nòm de qui cònste era titolaritat deth veïcul en permís de circulacion.
Principaus exempcions e bonificacions:
Es exempcions son totes obligatòries. Per contra, es bonificacions son totes potestatives, ei a díder, que maugrat que siguen previstes ena lei ei er Ajuntament qui, a trauès d’ordenança fiscau, decidís establir-les o non e ne regule es caracteristiques, era aplicacion des sues politiques fiscaus.
- Exempcions. Es mès importantes son:
o Es ambulàncies e rèsta de veïculs dirèctaments destinadi ara assisténcia sanitària.
o Es veïculs entà persones damb mobilitat redusida, sollicitud prealabla.
o Es veïculs matriculadi a nòm de persona damb minusvalidesa. S’autrege damb sollicitud prealabla e se se complissen es següents requisits:
- Era minusvalidesa a d’èster d’un grad parièr o superior a 33%.
- Era minusvalidesa a d’èster declarada pera Administracion competenta.
- Eth veïcul a d’anar destinat a usatge exclusiu dera persona damb minusvalidesa.
- Sonque se pòt gaudir d’aguesta exempcion entà un unic veïcul.
o Es tractors, remòrques, semiremòrques o maquinària qu'agen era cartilha d’inspeccion agricòla, sollicitud prealabla.
- Bonificacions. Es mès abituaus son:
o Bonificacion d'enquia 100% entàs veïculs damb ua antiquitat minima de 25 ans, en tot préner coma data d’antiquitat era dera sua matriculacion.
o Ua bonificacion d'enquia 100% entàs veïculs catalogadi coma istorics.
o Bonificacion d'enquia 75% en foncion deth carburant que consumisque eth veïcul e era sua incidéncia sus eth miei ambient.
o Bonificacion d'enquia 75% en foncion deth tipe de motor deth veïcul e era sua incidéncia en eth miei ambient.
Eth tipe impositiu
Ac determine er Ajuntament a trauès dera sua ordenança fiscau. Ei un coeficient que pòt anar d’1 a 2.
Coma se calcule er impòst?
Eth calcul deth tribut vire ath torn de dus elements:
- Eth tipe impositiu que s’apròve per Ajuntament ena aplicacion dera sua politica fiscau.
- Es tarifes establides en article 95.1 dera Lei d’Isèndes Locaus.
Coma tot eth sistèma tributari, se pòden diferenciar diuèrses quòtes tributàries:
- Era quòta intègra: se calcule en tot multiplicar era tarifa determinada per cada classa de veïcul en article 95.1 anterioraments mencionat peth tipe aprovat per Ajuntament.
- Era quòta liquida: se calcule en tot amendrir era quòta intègra en impòrt des bonificacions.
- Era quòta diferenciau: en cas der IVTM ei parièra ara liquida, donques que non i a ingrèssi a compde, pagaments fraccionadi, retencions o concèptes similars.
Meritacion deth tribut
Coma norma generau, er impòst merite eth 1 de gèr e totes es circonstàncies qu'entornegen eth hèt imposable en aguesta data restacaràn era sua tributacion.
Excepcions:
- Enes casi de naua inscripcion de veïcul, eth tribut se partirà per trimèstres naturaus, en tot tributar peth trimèstre en qué se da de nauta eth veïcul e pes restants.
- Enes casi de baisha definitiva deth veïcul, o de baisha temporau per sostraccion, se ben iniciauments calerà pagar era totalitat deth tribut, er obligat tributari, un còp pogue acreditar era baisha o sostraccion, aurà dret a ua devolucion derivada deth pròpri tribut que comprenerà es trimèstres que demoren entà finalizar er an (excludit eth trimèstre en qué s’a produsit era baisha).
Gestion deth tribut
Era gestion deth tribut correspon ar Ajuntament a on ei domiciliat eth veïcul. Era abitança deth veïcul se determine en basa ara abitança establida en permís de circulacion.
Er Ajuntament pòt delegar era gestion deth tribut a ua entitat supramunicipau que, en aguest cas, ei er OAGRTL dera Deputacion de Lhèida, qui, en resumit, a manada era foncion de confeccionar es padrons e es documents crubatòris deth tribut, assistir eth contribuent ena realizacion dera autoliquidacion deth tribut enes casi de nauta de veïculs, era aplicacion des exempcions e bonificacions legaus e es aprovades pes ajuntaments, era notificacion des documents crubatòris, era resolucion des recorsi contra actes de gestion, era resolucion des sollicituds de devolucion d’ingrèssi indegudi, era resolucion des sollicituds de devolucion derivada dera norma deth pròpri tribut, atau coma es atribucions qu'era Lei Generau Tributària e eth Reglament que regule era gestion e era inspeccion de tributs autrege as organs encargadi dera gestion tributària.
