Impòst sus er Increment de Valor des Terrens de Natura Urbana (Plusvalua) - Declaracion
Gestion tributària
Impòst sus er Increment de Valor des Terrens de Natura Urbana (IIVTNU) - Plusvalua
Declaracion der impòst
Quan i a ua transmission dera proprietat per quinsevolh títol (per exemple: crompavenda, donacion, acceptacion d’un eretatge) o ben era constitucion o transmission de quinsevolh dret reau de gaudi limitatiu deth domeni (per exemple: usufructe) sus un terren de natura urbana, se merite er Impòst sus er Increment de Valor des Terrens de Natura Urbana (IIVTNU), coneishut coma Plusvalua.
Aguest impòst municipau ei de caractèr potestatiu, o sigue, ei cada ajuntament qui decidís s'ei d’imposicion en municipi e n’apròve era regulacion mejançant ua ordenança fiscau. Donques, cau presentar era declaracion deth hèt imposable cada viatge qu'aguest impòst sigue aprovat e regulat ath municipi a on se tròbe plaçat eth ben immòble urban objècte de transmission.
Podetz consultar s'eth vòste ajuntament a delegada era gestion d’aguest impòst ar OAGRTL en apartat Eth tòn municipi d’aguest madeish web.
En apartat Informacion tributària trobaratz mès informacion sus aguest impòst.
Regulacion:
Articles 104 a 110 deth RDL 2/2004, de 5 de març, qu’apròve eth tèxte rehèt dera Lei Reguladora des Isèndes Locaus.
Ordenança fiscau municipau reguladora der Impòst sus er Increment de Valor des Terrens de Natura Urbana.
Ordenança generau de Gestion, Inspeccion e Recaptacion des Ingrèssi de Dret Public Locaus e d’auti ens, era gestion que n'a estat delegada ar OAGRTL dera Deputacion de Lhèida.
Qui a de presentar era declaracion:
A de presentar era declaracion eth subjècte passiu der impòst, qu'ei:
a) Enes transmissions a títol lucratiu, a de presentar era declaracion der impòst era persona qu'aquerisque eth terren o favor de qui se constituïsque o transmete un dret reau (per exemple: qui arrecep ua donacion, er ereu, qui arrecep er usufructe, eca).
b) Enes transmissions a títol onerós, a de presentar era declaracion era persona que transmet eth terren o que transmet o constituís eth dret reau (per exemple: eth venedor en ua crompavenda, eth que permute ua finca, eca). S’er obligat tributari ei ua persona fisica non residenta en Espanha, era lei preve que, en aguest cas, er obligat a presentar era declaracion ei qui aquerisque eth terren o a favor de qui se constituïsque o transmete eth dret reau (per exemple: quan qui ven un immòble urban ei un non resident en Espanha, er obligat a presentar e pagar er impòst ei eth crompador).
Quan cau presentar era declaracion:
Eth termini entà presentar era declaracion ei:
a) Enes transmissions que se hèsquen per actes intervius, 30 dies abils dempús dera data dera transmission (per exemple, era data dera escritura de crompavenda).
b) En cas d’actes per causa de mòrt, eth termini ei de 6 mesi (ampliable a 1 an a peticion deth subjècte passiu) a compdar dera data dera transmission (data deth decés).
S'era declaracion se presente dehòra de termini, er OAGRTL aplique un recargue per declaracion extemporanèa que pòt arribar ath 20% mès interèssi de demora.
Documentacion que s’a d’adjúnher ena declaracion:
Eth cas d’actes intervius:
- Fotocòpia simpla dera escritura de transmission dera proprietat o dera constitucion/transmission d’un dret reau de gaudi (exemples: còpia dera escritura de crompavenda, de donacion, eca.) que constituís eth hèt imposable der impòst.
- Fotocòpia dera escritura de transmission anteriora (se non cònste ena escritura naut indicada era data d’aquesiment dera finca).
- Fotocòpia deth recebut der IBI- Urbana.
En cas d’actes mortis causa:
- Fotocòpia dera escritura de manifestacion e acceptacion d’eretatge.
- Fotocòpia deth DNI der usufructuari, s'ei eth cas.
- Fotocòpia dera escritura de transmission anteriora (se non cònste ena escritura naut indicada era data d’aquesiment dera finca).
- Fotocòpia deth recebut der IBI- Urbana.
A on e coma cau declarar:
PER CORRÈU:
En tot enviar era declaracion dera plusvalua, amassa damb tota era documentacion, as Servicis Centraus der OAGRTL, Departament de Plusvalues, Rambla Ferran, 18 - 25007 Lhèida.
PRESENCIAUMENTS:
Per comparucion enes dependéncies d’atencion ath contribuent de quinsevolh des burèus der OAGRTL, en tot aportar tota era documentacion de besonh.
Consultatz eth hilat de burèus.
F01-PR7-S02 Declaracion de IIVTNU - Versió 3 Aranès.pdf
—
PDF document,
25Kb
