Modificacion dera ordenança fiscau generau entar an 2010
Naues mesures damb era volontat de facilitar eth pagament d'impòsti
Er Organisme Autonòm de Gestion e Recaptacion de Tributs Locaus (OAGRTL) dera Deputacion de Lhèida a aprovat ua modificacion des sues ordenances fiscaus damb er objectiu de favorir eth pagament d’impòsti. Era mesura s'aprovèc pendent eth darrèr conselh d’administracion der Organisme de Recaptacion conscienta dera malaisida situacion economica que patissen fòrça familhes.
Concrètaments, er art.46.6 dera Ordenança Generau prevedie enquia ara qu'eth pagament der Impòst de Bens Immòbles (IBI) urbana s’efectuèsse en dus terminis o fraccionaments. Damb era naua modificacion aprovada, a compdar der an 2010, se poderà hèr eth pagament der IBI damb domiciliacion bancària, en tres fraccionaments, en lòc de dus coma enquia ara.
Damb aguesta mesura, era OAGRTL preten facilitar eth pagament d’impòsti, en tot establir eth crubament der IBI urban en tres terminis e non en dus coma enquia ara.
Ua auta mesura aprovada a estat era modificacion der art.70, que hè referéncia ara obligacion d’aportar aval bancari en cas de peticion d’ajornaments d’impòsti. Actuauments, eth redigit indicaue qu'a compdar de 300 èuros ère obligatòria era aportacion d’aval bancari entad aqueri contribuents que vòlen ajornar o fraccionar eth sòn deute tributari.
Damb era naua modificacion, e damb efèctes entath 2010, eth limit s’incremente a 1.500 èuros, quantitat a partir dera que calerà er aval bancari. Aguest aument implicarà un estauviament en còst financèr que calie pagar as entitats financères en cas de peticion d’aval bancari, eth quau sonque serà obligatòri a compdar de 1.500 èuros e non a compdar de 300 èuros coma enquia ara.
Pendent eth 2008, er OAGRTL gestionèc eth crubament de 224.000 recebuts, 80% que ne son domiciliadi, per un impòrt globau de 43,4 milions d’èuros en IBI. Entad aguest 2009, ei previst gestionar mès de 232.000 arrecebuts, damb un impòrt superior as 50,1 milions d’èuros. Er Organisme gestione er IBI de 226 des 231 municipis dera demarcacion de Lhèida.
